فعلاً انا ضد اي اضراب بهدف زيادة مرتب او زيادة حوافز او الى ماشابه الحاجات دي, سواءً كان اضراب مدرسين أو عمال كذا أو هيئة كذا, لان ببساطة مقتنع ان الاضرابات دي ماشية في الاتجاه الخاطئ. طيب ايه هو الاتجاه الصحيح؟
لما نركز في الجملة الشهيرة العامية اللي كلنا بنقولها "زمان كانت الفلوس فيها بركة مع انها كانت قليلة", طيب ازاي قليلة وازاي فيها بركة؟ الإجابة هي مفتاح الموضوع, "الأسعار" ايوه الاسعار المتزايده باستمرار وبعشوائيه وبجنون هي سبب كل المصائب, فكروا معايا لما تكون عامل اضراب ويزيد مرتبك مثلاً بنسبة 30%, وتحس انك انتصرت في معركتك مع شركتك او هيئتك, وتفاجأ في اليوم التالي ان اجرة المواصلات زادت بنسبة 50% بحجة الوقود أو السرفيس أو المخالفات أو أي كان, وسيادتك هتدفع والجزمة لامؤاخذة فوق دماغك وان كان عاجبك ! وقيس على كده معظم اسعار السلع الاساسية والخدمات, قولولي بقى هل احنا كده ماشيين في الاتجاه الصحيح؟!
طبعاً من حق المدرس او العامل او اي فرد في المجتمع ان يعيش حياة كريمة, لكن غلط ان احنا ناخد موقف علشان نعالج العرض ونسيب أصل المرض والمشكلة ليتفاقم بسبب اننا مافكرناش تنصرف صح.
الاضراب اللي فعلاً لازم نعمله ونقف كلنا مع بعض فيه, هو الاضراب عن شراء السلع اللي اسعارها بتزيد بدون مبرر وبدون ضبط حتى لو كانت سلع اساسية, ساعتها يمكن ترجع شوية بركة من بتاعة زمان والامور تهدى والغليان يبرد شويه والمواطن العادي يتنفس شوية صعداء حتى لو كانت قليلة.
No comments:
Post a Comment